Monthly Archives: June 2017

Anza Kumwandikia Mtu Huyu Mmoja, Na Itakuwa Rahisi Kuwafikia Watu 1000.

Nimewahi kukushirikisha kuhusu sheria ya mashabiki wa kweli 1000. Sheria ambayo inasema kuweza kutengeneza kipato cha kutosha kama msanii wa aina yoyote yule, iwe ni mwandishi, mwanamuziki au mchoraji, unahitaji kuwa na mashabiki wa ukweli 1000. Hawa siyo watembeleaji au wasomaji, bali watu ambao wanakukubali sana. Watu ambao wako tayari kulipia kila huduma unayoitoa.

Sasa 1000 ni namba kubwa, hasa kama ndiyo unaanza safari yako ya uandishi. Ni namba ambayo ukiiangalia unaweza kukata tamaa, na kuona huna nguvu au muda wa kufikisha namna hiyo.

Leo nataka nikupe njia ya kufikia namba hiyo kwa uhakika, japo siyo kwa urahisi au kwa uharaka. Lakini kwa kufuata njia hii, bila ya kukata tamaa, utaweza kuwafikia watu 1000 na zaidi.

Njia ninayokwenda kukushirikisha leo ni kumwandikia mtu mmoja pekee. Anza kwa kumwandikia mtu mmoja, ambaye unahakikisha unamwandalia kitu ambacho kitamsaidia kutatua matatizo yake, au kufanya maamuzi bora ya maisha yake.

Fikiria mtu moja ambaye amekwama mahali kwa kukosa maarifa ambayo wewe unaweza kumpatia kupitia uandishi wako wa makala. Kisha andika makala ya kumsaidia mtu huyo. Andika makala ambayo itaongea na mtu huyu moja kwa moja. Halafu mkaribishe mtu huyu muongee kwa kina zaidi. Mkaribishe aulize swali au aombe ushauri kupitia kutoa maoni au kukutumia email. Mjue zaidi angependa kujifunza nini, kisha mpatie maarifa zaidi. Kwa njia hiyo utaanza na mmoja, na wengi wa aina hiyo watakuja, kabla ya muda utajikuta unao watu 10, 100 na hata kuendelea.

Naomba unielewe vizuri hapa, sizungumzii wale wasomaji, ambao unaweza kuona ni wengi. Nazungumzia mashabiki wako, wale wasomaji ambao wanakukubali mno. Hawa ndiyo nataka uanze kuwatengeneza hapa, kwa kuanza na mmoja. Ndiyo maana nasema uandike kitu kinachoongea naye moja kwa moja, kiasi kwamba atakutafuta, kwa kutaka kujifunza zaidi au kwa kuomba ushauri.

Ndiyo maana nimekuwa nasisitiza sana, blog yako inapaswa kuwa nyumbani kwako kwenye mtandao wa intaneti. Na unapaswa kuwa na email list, ambayo utaitumia kuwa karibu zaidi na mashabiki wako wa ukweli.

SOMA;Jinsi Unavyoweza Kupata Mawazo Ya Kuandika Makala Kila Siku Kwenye Blog Yako.

Kama hujui ni mtu yupi uanze kuongea naye moja kwa moja, anza na wewe mwenyewe. Ni kitu gani ungependa kujua ili kuwa bora zaidi? Ni mahali gani umekwama na ungependa kupiga hatua zaidi? Tatua hayo yako, halafu andika makala ya kuongea na mtu aliyekwama kama ulivyokuwa umekwama wewe, ukimpa hatua za kumsaidia, na hatosita kukutafuta na kutaka kujifunza zaidi.

Kitu kimoja unachopaswa kujua ni kwamba, kila changamoto au tatizo unalopitia wewe, wapo wengine pia ambao wanalipitia. Matatizo na changamoto za watu ni zile zile, sema tu zinakuwa na sura tofauti kulingana na mazingira ambayo mtu huyo yupo. Hivyo kila changamoto unayotatua, kila hatua unayopiga, msaidie mwingine pia. Hii ni njia nzuri ya kutengeneza mashabiki wako wa ukweli, ambao mtaweza kwenda pamoja na kufanya biashara kwenye mtandao wa intaneti.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.

Hichi Ndiyo Kitu Kinachowavutia Watu Kwenye Mitandao Ya Kijamii, Na Jinsi Ya Kukitumia Kutengeneza Kipato.

Njia bora kabisa ya kuweza kuitumia vizuri mitandao ya kijamii kutengeneza kipato, ni kujifunza kwanza tabia za watu, hasa wanapokuwa kwenye mitandao hiyo. Kwa kujifunza tabia zao, unajua namna gani unaweza kuzitumia tabia hizo kutengeneza kipato.

Hivi ndivyo makampuni makubwa yanavyofanya, ila wao wanatumia kompyuta na mtandao kukufuatilia wewe. Kama umewahi kuona hili, kama kuna kitu umetafuta kwenye mtandao wa google, au kitu unafuatilia sana, utajikuta matangazo mengi unayokutana nayo kwenye intaneti yanaendana na kile unachotafuta au unachofuatilia.

Makampuni makubwa kama google na facebook, yanazo kompyuta kubwa zinazokufuatilia kwa kila unachofanya, na hivyo kukuletea matangazo yanayoendana na yale mambo unayofuatilia. Ni mfumo mzuri ila una udhaifu mmoja, haupo sahihi kwa asilimia 100, kwa sababu siyo mtu anafanya hivyo, bali mashine.

Wewe unaweza kuboresha zaidi mfumo huu na ukaweza kukuza biashara yako na kutengeneza kipato kupitia intaneti na mitandao ya kijamii. Unachopaswa kufanya ni kujua tabia za watu unaowalenga, kisha kwenda nazo vizuri.

Swali muhimu sana la kujiuliza ili kujua tabia za watu kwenye mitandao ya kijamii ni hili; je watu wanaingia kwenye mitandao ya kijamii kwa madhumuni gani? Yaani mtu anapoamka na kitu cha kwanza kukimbilia simu yake na kwenda facebook au instagram, nini kinamsukuma?

Sidhani kama yupo mtu anayeingia kwenye mtandao wa kijamii akisema ngoja nikaone ni nguo gani naweza kununua leo. Au ngoja niangalie kitabu gani cha kununua, hilo hutokea baadaye, lakini siyo msukumo wake wa kwanza. Lakini watu wanatumia nguvu nyingi kuuza vitu hivyo kila wakati kwenye mitandao hii, wakifikiri hiyo ndiyo njia bora kwao.

Kwa kufikiria kuuza tu kwenye mitandao ya kijamii ni kosa moja ambalo wengi wanafanya na linawagharimu. Ndiyo wanaweza kuuza, lakini siyo kwa kiasi kikubwa kama ambavyo wangeweza kufanya iwapo wangetumia vizuri tabia za watu.

Watu wanaingia kwenye mitandao ya kijamii kwa msukumo mkubwa wa kutaka kujua nini kinaendelea duniani. Wanataka kupata habari, taarifa, maarifa, burudani na bila kusahau, kujua wengine wanaendeleaje na maisha yao.

SOMA;Sheria Muhimu Ya Kwenye Mtandao, Kwanza Kuwa Mtu Halisi.

Kwa maana hiyo basi, kwanza kabisa, unapokuwa kwenye mitandao ya kijamii, lazima kwanza uwe mtu, ndiyo watu wakufuate wewe kama mtu, wakitaka kujua nini kinaendelea kwenye maisha yako. Baada ya hapo wape watu taarifa na maarifa muhimu sana kwenye maisha yao, yanayohusiana na kazi au biashara unayofanya, ambayo unataka kupata wateja kupitia mitandao ya kijamii. Na hapo sasa ndiyo unaweza kuwapa huduma na bidhaa zako nyingine.

Usikazane kuuza muda wote, badala yake changanya utu wako, weka burudani kidogo, toa taarifa na maarifa muhimu. Hivi ndivyo vitu vinajenga urafiki na mahusiano mazuri kwenye mitandao ya kijamii na hatimaye sasa watu wanakuamini na kuwa tayari kununua chochote unachouza.

Na ili kufanikiwa kwenye hili, ni muhimu sana uwe na blog yako ambapo utawakaribisha watu kujifunza zaidi. Wale wanaokujua na mnaokutana kwenye mitandao ya kijamii, wanaweza kutembelea blog yako na kujifunza zaidi.

Pia unahitaji kuwa na mfumo wa kukusanya taarifa na mawasiliano ya wasomaji wako ili kuwapa maarifa zaidi na hatimaye kuwapa huduma na bidhaa zako. Hapo unahitaji kuwa na email list ambapo utakusanya mawasiliano ya wasomaji wako, na kuendelea kuwatumia email zinazowapa maarifa zaidi. Kupitia email hizo pia unaweza kuwauzia kwa urahisi zaidi kuliko kuuza moja kwa moja kwenye mitandao ya kijamii.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.

Aina Mbili Za Watumiaji Wa Mtandao Wa Intaneti Na Upande Unaopaswa Kuwa Wewe.

Kuna aina mbili za watumiaji wa mtandao wa intaneti, na aina moja kati ya hizo ndiyo inanufaika sana na mtandao huu.

Aina ya kwanza ni ya watazamaji, hawa ni walaji wa kila kinachozalishwa kwenye mtandao wa intaneti. Wanachofanya wao ni kufuatilia kila kinachoendelea, na wanachoweza kufanya ni kupenda, kuchukia au kuchangia kwenye kile ambacho wanaona. Kundi hili hawanufaiki chochote kifedha, zaidi ya raha ya muda mfupi, na wakati mwingine chuki na wivu hasa pale wanapoona maisha ya wengine ni mazuri kuliko yao.

Aina ya pili ni wafanyabiashara, hawa ni wazalishaji wa kile ambacho watu wanafuatilia kwenye mtandao wa intaneti. Wanachofanya hawa ni kuzalisha taarifa na maarifa ambayo wengine watayafuatilia na hatimaye kuweza kuwauzia vitu ambavyo wanauza. Kundi hili linanufaika sana kifedhakwenye mtandao wa intaneti.

Katika makundi haya mawili, unapaswa kuwa kwenye kundi la wafanyabiashara, wale wanaozalisha maarifa na taarifa ambazo zinafuatiliwa na wengine, na baadaye kuweza kutengeneza kipato.

Huhitaji kuwa na kitu kikubwa ili kuwa kwenye kundi la wafanyabiashara kwenye mtandao, unachohitaji ni kuchagua eneo ambalo unaweza kuwapa watu taarifa na maarifa yanayowawezesha kufanya maamuzi bora kabisa kwenye maisha yako. Baada ya hapo unahitaji kuandaa bidhaa au huduma ambayo unaweza kuwauzia watu na wakanufaika zaidi.

SOMA;Unapolalamika Kuhusu Mitandao Ya Kijamii, Umeamua Kupoteza Fursa Ya Kutengeneza Fedha.

Sasa kazi yako kubwa inakuwa kutumia mtandao wa intaneti kutoa maarifa na taarifa zako kwa watu. Kutengeneza wasomaji na wafuatiliaji wa taarifa zako. Kuwa na blogu ambayo ina taarifa zote unazotoa, na zaidi. Kuwa na mfumo wa email ambapo unawasiliana kwa karibu zaidi na wasomaji wako. Kwa njia hii unakuwa umejenga biashara yako kwenye mtandao wa intaneti. Kitu ambacho kila anayeamua kufanya, anaweza kufanya.

Unachagua kuwa kwenye kundi lipi? Kama unataka kuwa kwenye kundi la wafanyabiashara, basi anza kuchukua hatua sasa. kama huna blogu ya kuanzia, tuwasiliane kwa wasap 0717396253. Karibu sana.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.

Hivi Ndivyo Unavyojizuia Kunufaika Na Mtandao Wa Intaneti.

Mtandao wa intaneti, ni fursa bora sana kwa zama zetu. Ni kitu ambacho kimempa nguvu kila mtu ya kufanya kile ambacho, miaka michache iliyopita, kilifanywa na wachache pekee, ambao walichaguliwa au walipendelewa.

Siku za nyuma ili uweze kuandika kitabu, kutengeneza kipindi cha tv au redio, kuandika makala, ilikuw ampaka ukubalike na vyombo vinavyozalisha vitu hivyo. Kama hukuchaguliwa au kukubalika basi ndiyo umekosa fursa.

Lakini sasa hivi, kama unataka kuandika kitabu ni wewe tu unajizuia, kwa sababu unaweza kukiandika mwenyewe na hata kukiuza mwenyewe kwenye mtandao wa intaneti, wala hata huhitaji kukichapa. Kama unataka kutengeneza kipindi cha tv, ni wewe tu uchukue simu yako, urekodi video yako na kuiweka kwenye mtandao. Hakuna wa kukuzuia au wa kukuambia usubiri mpaka akuchague.

Pamoja na fursa hii kubwa, bado watu wanajizuia kuchukua hatua.

Bado watu wanapenda kuandika, lakini wanasubiri, hawaandiki na wanasubiri wasijue wanachosubiri ni nini.

Bado watu wana mawazo mazuri ya kutengeneza vipindi vizuri vya tv au redio, lakini hawazalishi, wanasubiri mpaka mtu aje kuwaambia wanaweza.

Ninachotaka kukuambia leo ni hichi, wazo ulilonalo, hakuna wakati bora wa kulifanyia kazi kama sasa.

Kama ni wazo la kuandika, anza na blog, andika kile ambacho ungependa wengine wajifunze. Andika kile ambacho wewe mwenyewe unapenda kujifunza.

Una wazo la kipindi cha tv au redio? Unasubiri nini? Chukua simu yako, rekodi sauti au video yako na washirikishe watu kwenye mtandao wa intaneti. Mitandao karibu yote ya kijamii inaruhusu kuweka video, mtandao wa youtube ni mahususi kwa ajili ya video, kama unasubiri, umeamua kujichelewesha wewe mwenyewe.

SOMA;Sheria Muhimu Ya Kwenye Mtandao, Kwanza Kuwa Mtu Halisi.

Huu siyo wakati wa kusubiri rafiki, huu ni wakati wa kuinuka na kuingia kwenye mchezo. Mtandao wa intaneti umeleta usawa kwenye kila aina ya mchezo, kila aina ya biashara. Kinachokuzuia sasa, ni wewe mwenyewe, hakuna mwingine yeyote.

Unaposubiri mpaka watu wakuambie unaweza, au unaruhusiwa kufanya, ndiyo unajizuia wewe mwenyewe kunufaika. Ni vyema ukachukua hatua sasa kwa sababu unakosa mengi kwa kutochukua hatua.

Chochote ambacho unafikiria kufanya, ambacho kitawanufaisha wengine, anza kufanya sasa. Anza kwa kuandika kwenye mitandao ya kijamii, andika kwenye blog yako na rekodi sauti na video kisha weka kwenye intaneti. Endelea kuboresha kile unachofanya na baada ya kuwa utakuwa umetengeneza jukwaa utakalotumia kuwafikia wengi zaidi na hata kunufaika kwa kipato pia.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.

Kabla Hujafikiria Kulipwa Kwenye Mtandao, Andika Kwanza Makala 100.

Kila siku nimekuwa napokea maombi wa watu wanaotaka kuanza kutengeneza kipato kwenye mtandao kwa kutumia blog zao. Ninapoangalia blogu za watu hao, nakutana na kitu kimoja, bado hazijafikia hatua ya kuweza kutengeneza kipato cha uhakika.

Watu wamekuwa na haraka sana ya kutengeneza kipato kwenye mtandao, na haraka hii imewafikisha kwenye mikono ya watu ambao wanawadanganya na kuwalia fedha zao. Wanawaambia ili blog zao zitengeneze kipato basi watengenezewe adsense, hii ni program ya google ya kuweka matangazo kwenye blog.

Watu hufikiri wakishakuwa na adsense basi pesa nje nje, na hakuna uongo kama huo. Ili uweze kutengeneza fedha kwa kutumia adsense, unahitaji kuwa na watembeleaji wengi, wengi mno, malaki kwa siku. Na hapo siyo kwamba utakuwa na uhakika wa kutengeneza kipato kikubwa kwa siku, ni dola chache pekee.

Sasa kwa jamii yetu, hasa ya kitanzania, kuna kitu kimoja kinaweza kukuletea wasomaji wengi sana kwenye blog yako kwa siku, kitu hicho ni habari za udaku na picha za uchi. Ukiwa na blog ya aina hiyo, utapata wasomaji wengi na huenda ukapata dola chache kila siku kwenye adsense. Lakini kwa blog za mafunzo, blog ambazo zinatoa maarifa, unapoanza huwezi kuwa na wasomaji wengi kiasi hicho.

Na swali muhimu sana, unafikiri ukiwa na blog ya udaku na picha za uchi inakufikisha wapi, hasa siku za baadaye? Kama unataka fedha tu sawa, ila kama unataka kujenga jina lako kama mtaalamu, blog ya udaku haikufai, ni kupoteza muda wako na heshima yako.

Hivyo nimekuwa nasisitiza, njia ya mtu kulipwa kwenye mtandao wa intaneti kupitia blogu yake ni kutoa huduma zake mwenyewe. Unakuwa na wasomaji, ambao wanakuamini na kukufuatilia, na hapo unawapa makala za bure, na baadaye unawauzia huduma zako nyingine. Huduma kama vitabu, ushauri wa kulipia, mafunzo ya semina na njia nyingine nyingi.

SOMA;Njia Kumi (10) Unazoweza Kuanza Kutumia Leo Kutengeneza Fedha Kwenye Mtandao Wa Intaneti.

Sasa, unapoanzisha blogu yako, kuanza kutaka kulipwa ni kujidanganya. Kama una makala 10, 20 au 30 na unataka watu wakulipe unajidanganya. Watu hata hawajakujua bado, hawajakuzoea bado, unakimbilia wapi?

Ninachowashauri wanaoanza blogu ni hichi, andika kwanza makala 100, ndiyo namaanisha makala MIA MOJA, kabla hujaanza kuwauzia watu kitu. Andika kuwapa watu maarifa sahihi juu ya kile unachoandikia, wape watu na wape zaidi. Hakikisha wanapokuwa na shida kuhusiana na eneo unaloandikia, wa kwanza kufikiriwa ni wewe. Baada ya hapo ndipo unaweza kuja na huduma nyingine na watu wakakusikiliza.

Kwa nini makala 100? Kwa sababu 100 siyo namba ndogo. Kwa kuandika makala 100, kama ni makala moja kwa siku, itakuchukua labda miezi mitatu, na inaweza kwenda mpaka mwaka mmoja kulingana na idadi ya makala unazoandika kwa wiki. Hichi ni kipindi kizuri cha wewe kujitengeneza kama mtaalamu. Wewe mwenyewe unajijua kiundani, unaona ni maeneo gani ambayo unaweza zaidi. Kipindi hichi pia utawajua wasomaji wako vizuri, kwa maswali watakayokuuliza na ushauri watakaokuomba.

Hivyo kabla hujaanza kuwauliza watu wakulipe, kwa namna yoyote ile, andika kwanza makala 100, makala za maana zenye kutoa maarifa kweli kwa wasomaji wako. Na hapo utakuwa umejiweka kwenye nafasi nzuri ya kuweza kutengeneza kipato.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.

Jinsi Unavyoweza Kupata Mawazo Ya Kuandika Makala Kila Siku Kwenye Blog Yako.

Kwa mtu yeyote ambaye anataka kutengeneza kipato kwenye mtandao wa intaneti, kitu cha kwanza kabisa anachopaswa kufanya ni kuwa na blog. Blog ndiyo nyumbani kwako kwenye mtandao wa intaneti. Hapa ndipo unapoweka kila kitu kinachokuhusu wewe. Mitandao ya kijamii ni sehemu muhimu, ila haiwezi kukusaidia sana iwapo huna blog yako mwenyewe.

Kuwa na blog pekee haitoshi, kwa sababu watu hawataijua blog yako kwa sababu ipo. Bali wataijua blog yako kutokana na kazi unazoweka kwenye blog yako. Unahitaji kuwa na makala nyingi kwenye blog yako, makala zinazowasaidia watu kutatua matatizo yao na kuwapa maarifa ya kuwawezesha kufanya maamuzi sahihi.

Njia ya uhakika ya kuifanya blog yako kuwa na makala nyingi, na kuwa karibu na watu ni kuandika kila siku. Unapoandika kila siku inakuwa rahisi kwako kuikuza blog, na pia makala zinakuwa mpya kila siku. Tofauti na kuandika makala nyingi siku moja kwa wiki au mwezi, ambapo muda unaweza usiwe rafiki kwako, na makala zikawa hazina utofauti mzuri.

Changamoto ya kuandika kila siku ni hii; kuna wakati mwandishi unakosa cha kuandika. Unapanga muda wa kuandika, lakini muda unapofika unaona huna cha kuandika. Unakazana kufikiria lakini ndiyo kabisa unakosa cha kuandika.

Hapa nakupa njia za kukuwezesha kupata mawazo ya kuandika kila siku, na kamwe hutakosa kitu cha kuandika.

  1. Soma sana vitabu vinavyoendana na yale mambo unayoandika.

Hakikisha kila siku kuna kitabu unachosoma kinachohusiana na mambo unayoandikia. Vitabu vipo vingi sana kama utatafuta na kutenga muda wa kusoma kila siku. Kupitia vitabu unaweza kupata mawazo ya kuandikia. Na kizuri zaidi, unaweza kuchambua kitabu unachosoma. Hivyo kitabu kimoja kinaweza kukupa makala nyingi uwezavyo.

Hivyo kama utapanga kusoma angalau kitabu kimoja kila wiki, hutakosa mawazo matatu ya kuandikia na pia kuandika makala ya uchambuzi wa kitabu hicho.

Usiniambie huna muda wa kusoma, mwandishi ambaye hasomi hajui kile anachoandika.

  1. Angalia matatizo yako binafsi, na yale unataka kujifunza.

Kila siku jiulize ni tatizo gani unalo ambalo ungependa kulitatua? Au ni kitu gani ambacho ungependa kujifunza zaidi? Tatua tatizo lako, au jifunze kile unachotaka kujifunza, kisha washirikishe wasomaji wako kwa kuwaandalia makala zinazoendana na kitu kile. Hii ni njia nzuri sana kwa sababu chochote unachotaka kujifunza, wapo wengine kama wewe ambao wanataka kujifunza pia. Wakijua unajifunza, watakuwa wafuatiliaji wako wa karibu.

  1. Angalia matatizo ya wengine.

Kwenye lile eneo unaloandikia, angalia matatizo ya wengine, angalia watu wanasumbuka na nini zaidi. Angalia makosa watu wanafanya, angalia changamoto watu wanakutana nazo. Na wewe zifanyie kazi, jifunze namna ya kutatua na washirikishe kwenye makala. Hakikisha kila changamoto watu wanaipitia unaitafutia suluhisho na kuwashirikisha wasomaji wako.

Habari njema ni kwamba, matatizo ya watu hawaishi, changamoto hazitakuja kukoma duniani, hivyo kila wakati utakuwa na mambo mengi ya kuandikia.

SOMA; Changamoto Mbili Zinazowakwamisha Waandishi Wa Makala Na Jinsi Ya Kuzishinda.

  1. Wafundishe watu kitu ambacho hawajui.

Kuna mambo mengi sana ambayo watu hawajui juu ya eneo unaloandikia. Yajue mambo hayo na wafahamishe watu. Waandishi wengi wamekuwa wanafikiri kwamba kile wanachojua wao basi kila mtu anajua. Utashangaa sana ukiwauliza watu, utagundua uelewa wao ni mdogo sana kuliko ulivyofikiri. Na wakati mwingine hata kama wanajua, taarifa nyingi walizonazo siyo sahihi. Hivyo kila wakati wape watu maarifa sahihi kwa maeneo muhimu ambayo kila mtu anapaswa kuyajua.

  1. Angalia kile ambacho kila mtu anakubaliana nacho, halafu pingana nacho.

Wakati mwingine unaweza kuamua kuwa tofauti na wengine. Mara nyingi kitu kikiwa kinashabikiwa na kukubaliwa na wengi, huwa kuna matatizo watu huwa hawayaoni. Mapenzi yao yanawapa upofu na hivyo kujikuta kwenye changamoto. Wewe kaa chini na angalia kwa kina, kisha andika makala ya kuwaonesha watu kile ambacho hawaoni.

Unapochagua hili kuwa makini, kuna watu watakupinga na hata kukuchukia, hivyo hakikisha chochote unachopinga, una udhibitisho wa kufanya hivyo. Usiandike tu kujitafutia umaarufu.

  1. Soma tafiti mbalimbali zinazohusiana na unachoandika.

Kuna tafiti nyingi huwa zinafanywa kwenye kila eneo la maisha yetu. Tafiti hizi mara nyingi huwa ni kwa sababu za kitaaluma na hivyo wanataaluma ndiyo wanazifaidi. Wananchi wa kawaida huwa hawazielewi tafiti hizo. Unaweza kutumia fursa hii kuzisoma tafiti na kujaribu kuzielezea kwa lugha ambayo mwananchi wa kawaida anaweza kuielewa.

Kwa njia hii utapata makala nzuri za kuandika na watu watanufaika na tafiti zinazofanywa kila siku.

Haya ni maeneo sita unayoweza kuyatumia kila mara na ukawa na makala za kuandika kila siku. Muhimu ni wewe kuwa na mpangilio mzuri ili kuweza kuwa na makala nzuri na zenye msaada kwa wasomaji wako.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.

Changamoto Mbili Zinazowakwamisha Waandishi Wa Makala Na Jinsi Ya Kuzishinda.

Kuna changamoto kuu mbili ambazo waandishi wa makala na hata vitabu wanakutana nazo.

Moja ni kukosa kitu cha kuandika, hapa unapanga kuandika, lakini unaona hakuna unachoweza kuandikia. Unaweza kukaa ukitoa macho kwenye eneo lako la kuandika na usipate kabisa uandike nini.

Changamoto ya pili ni kutumia muda mwingi kwenye kuandika na hata kuahirisha unapokuwa umefika katikati. Ukishaachia kuandika katikati, inakuwa vigumu zaidi kuja kuanza tena kuandika.

Changamoto hizi mbili zimewakwamisha waandishi wengi na hivyo kuzitatua kutakuwezesha kupiga hatua. Muhimu zaidi ni kwamba, kama mwandishi, kila siku unapaswa kuandika, hivyo kukosa kitu cha kuandika, au kutumia muda mwingi kwenye uandishi, kunakuwa kikwazo kwa mafanikio yako.

Unatatuaje changamoto hizi mbili?

Changamoto hizi mbili zinaweza kutatuliwa na ukaweza kuwa na mawazo mengi ya kuandika na hata kuandika ndani ya muda mfupi. Zifuatazo ni hatua muhimu kufuata ili changamoto hizi zisikuzuie.

  1. Panga utakachokwenda kuandika kabla ya muda wa kuandika.

Usisubiri mpaka muda wa kuandika ndipo ufikirie uandike nini. Kwa kufanya hivyo utakosa uandike nini na kadiri utakavyokazana ndivyo unazidi kukosa.

Badala yake panga mapema unakwenda kuandika nini, kabla ya muda wa kuandika haujafika. Kama utaratibu wako ni kuandika asubuhi, basi jioni andaa kabisa utaandika nini siku inayofuata. Hili pia linakupa faida, maana unapokuwa na wazo la kuandikia, ukilala na kuamka nalo, unakuwa umelitafakari kwa kina zaidi.

  1. Fanya utafiti kabla ya muda wa kuandika.

Kinachowakwamisha waandishi wengi, na kuwapelekea kutumia muda mwingi ni kufanya utafiti. Siku hizi kufanya utafiti ni rahisi kupitia njia ya intaneti. Na hivyo wengi husubiri mpaka muda wa kuandika, hivyo wanaandika huku wakifanya utafiti kwenye intaneti. Hili linafanya zoezi la kuandika kuwa refu.

Unachopaswa kufanya ni kufanya utafiti wako kabla ya muda wa kuandika haujafika. Unachofanya ni unapokuwa na wazo la kuandika, lifanyie utafiti kabisa, chagua ni hoja gani unakwenda kuiongelea na vitu gani vitaitetea hoja yako. Unapofika wakati wa kuandika, kazi yako ni kuandika na siyo tena kufanya utafiti.

  1. Tenga muda maalumu wa kuandika, na andika, usifanye kingine.

Ukishajua unatumia muda gani kuandika makala yako, tenga muda maalumu ambao utakuwa unaandika kila siku. Na kila siku andika kwenye muda ule. Muda huo wa kuandika ulinde kabisa, usikubali uingiliwe na kelele yoyote. Na unapoanza kuandika, andika mpaka ualize, usiishie njiani. Kwa sababu unapoishia njiani, itakuchukua muda mrefu unapokuja kuanza tena kuandika.

Haya ni mambo matatu ambayo ukiweza kuyafanya, utaboresha uandishi wako, kila wakati utakuwa na kitu cha kuandika, utapunguza muda wa kuandika na pia utaacha kuahirisha uandishi wako na kuishia njiani. Yafanyie kazi kila siku na endelea kuboresha uandishi wako kila siku.

Tumia ujuzi, utaalamu na uzoefu wako kutengeneza kipato kwenye mtandao wa intaneti kupitia MTAALAMU NETWORK. Kupata ushauri wa blog na jinsi ya kutengeneza kipato tuma ujumbe wasap namba 0717 396 253.

Makirita Amani,

Kupata blog yako ya kitaalamu na kuweza kutengeneza fedha kwenye mtandao, BONYEZA MAANDISHI HAYA.

Kupata kitabu cha JINSI YA KUTENGENEZA FEDHA KWENYE MTANDAO KWA KUTUMIA BLOG, bonyeza maandishi haya.

KUPOKEA MAKALA NA MAARIFA YA KUTENGENEZA FEDHA KWA BLOG KWENYE EMAIL YAKO BONYEZA MAANDISHI HAYA NA UJAZE FOMU.